Уд вормы астэ ачид

Александр Гротендик математиклэсь «Аран но кизён» («Recoltes et Semailles») книгазэ* лыдӟисько. Ӧжыт синвуаськыса но басьтӥ.

Книгаез – кылбур кадь, тодосчилэн лул-пуш улоназ бугыръяськон, солэсь кема но секытэн ужамзэ - «виресь ӟустаризэ»-  возьматон, эшшо автор примеръёс (чиньы) вылын тодосэн вырись муртлэсь этиказэ усьтэ.

grotendik1«Аран но кизён» ӟырдыт, пӧсь мылкыдо адямиен гожтэмын бере, сое омырез сямен пушкад кыскиськод. Математикаын Гротендик ассэ корка пуктӥсь шуэ. Кин ке но яратэ дась юрт пушкын улыны, сое утьыны, арбериоссэ интыысь интые вошъяса возьыны. Нош мукетызлэн ужез – нюлэсэз сайкыса, отчы выль юрт пуктон. Гротендик – корка ӝутӥсь. Со ассэ шудо шуэ: ноку но муртэн дась сётэм очки пыр улон но яратоно ужез шоры учкымтэ.  Со, пичи пинал сямен, бадӟым муртъёслы тодмо дуннеез эшшо огпол, выль сямен усьтэм.

Собере бадӟым математикалэсь палэнскем. Математикаен гинэ вырыса, инлык, пе, сӧриськиз. Кутскем со пуш дуннезэ  эскерыны. Сьӧлыкъёссэ валам. Соосты ноку но быдтыны уз луы шуыса валам. Астэ ачид яратонэз ноку но уд быдты.

Эшшо Гротендик вера, студентъёсты дышетыны, «атай»  кариськыны яратэмез сярысь. Солэн трос дышетскисьёсыз вылэм, котькудзэ со гажам. Адями математикаез яратэ ке, со ӝуа ке, ӵош шумпотыса дипломез, диссертациез бордын тыршиськом вал, шуэ. Куддыръя быдэс нуналэн но дышетскисеныз кенешыса, валче  ужпумъёсты, пе, сэрттӥм-пертчим. (Тань та интыын мон бӧрдӥ, аслэсьтым йыромонъёсме тодэ вайыса, куке тон пукиськод но, тыныд некинэн вераськыны: вӧзад ӧвӧл ачид кадь ик темадэ яратӥсь но тонэ валась мурт.)

Озьы ке но, Гротендик шуэ, синазькыль карись дышетскисьёсыз но вал. Малы? Малы? Мон солы вань сюлэмме, кужымме сётӥсько, нош со монэ адӟонтэм кариз, пе. Мискинь гений…

Тодос этика сярысь гожтэмез мыным пайдаё потӥз.
Профессоръёс, учыр шеде ке, пе, студентъёссэс ултӥяны шумпото, соиз визьмо ӧвӧл ке. Но ведь адямилэсь йыр кобыысьтыз быгытзэ гинэ-а гажано? Нош мыло-кыдо тыршемзэ, ассэ адямиез?

Мыным ӝож вал, гожтэ Гротендик, адямиос малпанъёсме куто но уг пусъё, асьсэлэн ӧвӧл шуыса. Собере, пе, валай: мон  идея гинэ сётӥ, нош адями ачиз ини, огназ со возьматэм сюрестӥ мынэ .

Кыӵе ке егит пияш мӧйы тодосчилэн кема ужам удысаз пырыса,  выриз-выриз но со мӧйы муртлэсь кемалась тодмо малпанзэ выльысь усьтӥз ке но - мед, солы сюрес сётоно,  ведь пияш ачиз отчы вуиз. Огназ открытие лэсьтӥз но бумага вылэ нырысьсэ пусйиз.

Собере ма… Лыдӟисько на.

*Гротендик печатлам книгазэ библиотекаосысь куштыны косэм вылэм. Озьы ке но "Урожаи и посевы" книга кызьы ке югыт дуннее кылем.