Эше ӧсэз ачиз усьтӥз но пыраклы потӥз та дуннеысь.
Гожтӥсько тае ваньзэ оло сое, оло асме простить карон понна. Поттоно пушкысь та вӧсез, пушкез, лулэз но мугорез сутыса но висьытыса медаз улы шуыса.
Шуо, нокин уг тоды Д.-лэсь ассэ ачиз быдтонэзлэсь мугзэ. Мон шуисько: солэн депрессия вал. Мыным вазёзы: тросэзлэн депрессия, и мар табере? Котькин курадӟе, котькинлэн улоназ шуг-секытъёсыз кылдо, нокин но быдэсак ассэ шудоен лыдъяны уг быгаты. И мар табере? Табере тон малпаны кулэ, озьы ик курадӟыса, вӧсез чидаса улыны кулэ. Будто ке со озьы ик кулэ. Зӥбыт кариськыса, чидаса улоно... "Из но, му но пилиське но, адямилы чидано..." Вот озьы улыны дышетэмын но дышемын. Ваньзы озьы уло, бигерез но, удмуртэз но. Только ведь формула весяк уг ужа, ваньмызлы уг тупа. Кин ке но пилиське.
Простить кароно вал кызьы ке но, адями уг тупа огдышем кабе шуыса. Уг тупа, уг. Кинлы ке но Инмар сётэм улон-нюръяськон кужым но тазалык черык тыр, кинлы ке - одӥг сюграм. Адямиос ваньзы огкадесь ӧвӧл, эн вералэ. Сюэз пӧлысь огез батыр, со улоз, кылемез кулоз. Кин ке но вера, адями туж кужмо, ваньзэ бералтыны быгатэ шуыса. Бен, тодазы возё вормись батыръёсты, лузеръёс вуно. Мынам чужатаелы 93 арес, со войнаез пырпотӥз, а ведь со сяна семьяысь ньыль пиосмурт кошкиз, соос ӧз берытске. Инмар котькинлы огкадь улыны кужым но задор мылкыд уг сёты. Куд-огезлы гинэ.
Озьы ке но, озьы ке но... Юалляськы вал, кызьы улӥськод шуыса. Ар но ӝыныен вераськытэк ул но. Мон котьку но ачим нырысь гожъялляй, вазиськылӥ, жингыртылӥ солы. Но туж кышкаса вазиськылӥ, кылъёс бырйыса. Сямы сыӵе: деликатность, выжыятыса юалляськыны но вераськыны умойтэм потылӥз. Вот озьы, матысь эшеныд, кудӥз нуналлы быдэ онлайн - аськаын, контактын, кудӥныз клубын юмшам-эктӥм, котьку вал кыӵе ке но дистанция, гож, кудзэ выжыны уг яра. Малы? ма озьы улыны дышемын, мынам котьку но озьы вал - туганэн но, анай-атаен но, эшъёсын но. Потты вал вӧсьдэ, кисьты вал мылкыддэ, уз валалэ, да ачид но вераны уд быгаты, мар тонэн. Верад ке но, шуозы, котькинлэн огкадь шуг-секытъёсыз, тунсыко ӧвӧл, ёртӥськод олокыӵе чыры-пырыосын. Тон понна кыӵе ке учыр - со трагедия, мукетызлы чыры-пыры. Огъя вераса, ум валаське асьмеос ог-огместы.
Мар бен, калленом адями кусыпъёс но воштӥськозы, дыр. Возьдаськонлэсь мозмытскомы, дышомы асьмеды яратыны, кылзӥськыны но валаны, ум улэ уллёя кариськыса, авторитетлэсь кылзӥськыса, дышетскомы утчаны ӟеч адямиосты, кин быгатоз лулэз буйгатыны.
Асме чакласа, валасько, уг быгатӥськы муртэз буйгатыны но, асме но буйгатыны уг быгато. Простить кароно вал тае ваньзэ, ведь улэм потэ, висьытэк улэм потэ. Улонлы шумпотыса, ӟечезлы оскыса.